Një fjalë në muaj nga Gjirokastra vol.16

Kreshnik Merxhani sjell fjalë nga fondi i trashëgimisë kulturore shqiptare në formën e një rubrike periodike, të cilat do të vijnë në formën e nje botimi  “Fjalori i Arkitekturës Tradicionale në Gjirokastër”,  i cili është në punë e sipër.

Fustanellë/a Shum. Fustanell/at

Emër

Kështu emërtohet një mënyrë element që i vendoset strehëve në ballet e odave të banesave të cilat në pjesën e këndeve të tyre tradicionalisht kanë qenë të rrumbullakosura dhe mbaheshin prej tre teskekëve që quhen “tre vëllezërit” (për këtë shih fjalën përkatëse).

Fustanella është kështu një dërrasë e hollë rrobulli (lloj pishe e kuqe) e gdhendur me motive dekorative që krijojnë një ritëm dhe krijojnë kështu një perde (perdhe) të strehëve duke shërbyer dhe si pikore në rastin kur shiu mundet të shkojë aty prej erës. Emrin me siguri e ka marrë nga forma e rrumbullaktë dhe hapja e saj njësoj si fustanella e kostumit kombëtar.

Shkallë Fustanellë

Emër

Kështu emërtohen shkallët helikoidale, shkeljet (basamakët) e të cilave rrotullohen rreth një aksi, apo dhe pjesë të shkallëve ku për arsye të mungesës së hapësirës, pjesë e rampës së tyre zgjidhet me shkelje të tilla. Emërtimi ka ardhur pa dyshim nga pjesa e fustanellës së kostumit kombëtar, palët e së cilës shpërndahen nën të njëjtën logjikë rreth belit.

Foto dhe Skica nga Ark. Kreshnik Merxhani

Kreshnik Merxhani  është diplomuar për Arkitekturë në Universitetin Politeknik të Tiranës. Ai është i fokusuar përgjithesisht në Arkitekturën Tradicionale.
Prej 2008 ai është i angazhuar si bashkëautor në projekte restaurimi dhe rijetëzimi të disa monumenteve të periudhës Osmane dhe Komuniste kryesisht në Qytetin e Gjirokastrës.
2014-2016 ka qenë Shef i Sektorit Teknik pranë DRKK – Gjirokastër, zyrë në varesinë e Ministrisë se Kulturës.
Gjatë kësaj kohe ka qenë Arkitekti kryesor për hartimin e disa projekteve të rëndësishme si Projekti për Restaurimin dhe Rijetëzimin e Kalasë së Libohovës, Projekti për Restaurimin e Banesës së Eqerem Çabej etj.

arkitekteza